Umap-apela manen ti kameng ti City Environment Park and Management office (CEPMO) kalpasan nga adda manen ti nadadael a mula sadiay Burnham Park.
Impeksa ni Atty. Rhenan Diwas dadaulo ti City Environment Park and Management office (CEPMO) ti panakadismayana kalpasan a maysa nga unidentified passerby ti nangdadael kadagiti stable-rooted pine sapling iti nasao a lugar.
Iti pannakiuman ti Bombo Radyo iti City Environment Park and Management office (CEPMO) maintenance agarup alas kwatro iti agsapa a naireport kadakuada babaen iti kadwada metlaeng nga empleyado.
Sigun kadakuada tallo a puon ti pine tree nga addaan iti kadakkel a 1-2 meters ti nadadael ken nu ar-arigen ket ti maysa a puon ti bayadna ket agarup P500 agingga P1,000.
Nadismaya met dagiti agmulmula sadiay gapu ta nagregget dagitoy a mapabiag ken mangpaadu iti kayo iti siudad ngem nadadael laeng.
Impeksada a daytoy nga insidente ket naigagara gapu ta saan laeng a dayta ti umuna a gundaway a nadadael dagiti mula iti Burnham park.
Nupay kasta, saan a natakwatan ti pakabigbigan ti suspek gapu ta awan metlaeng ti nakita ken saan a nadanun ti CCTV ti nakapasamakan ti insidente.
Ti insidente ket napasamak iti igid ti lake drive pathway.
Iti statement ni Atty. Diwas, ti pannakadadael dagiti mula ket maysa a krimen no sadino ket mabalin a mamulta no siasinoman ti mangdadael kadagiti nasao a mula.
Gapu iti dayta nga insidente, nabalaagan dagiti security ti City Environment Park and Management office (CEPMO) tapno mas ingetanda pay ti pangronda dagitoy.//Bombo Noveh Organo
