BAGUIO CITY – Repasuen manen ti Baguio City Police Office (BCPO) ti checkpoint strategy dagitoy.
Kasaruno daytoy ti dua nga insidente a panakapapatay ti dua a taxi drivers sadiay Km. 4, Asin Road ditoy siudad ti Baguio ken sadiay Badiwan, Poblacion, Tuba, Benguet idi napalabas a lawas.
Sigun kenni PSSupt. Ramil Saculles, City Director ti BCPO, babaen iti panangrepasoda iti checkpoint strategy dagitoy ket makita no anya dagiti nagbiddutanda iti implementasyon ti istratehiya.
Patienna a posible nga inadal dagiti suspek ti checkpoint strategy dagiti pulis.
Inayonna nga adalenda pay no kasano a mairtengan ken mapatibker ti panakaimplementar ti checkpoint.
Imbilinna met kadagiti station commanders dagiti 10 a kwerpo ti BCPO ti panangrepaso dagitoy kadagiti hotspots iti masakupanda a babbarangay.
Dinakamat pay ni Saculles a manamnama a kadagiti sumaruno nga aldaw ket manayonan ti checkpoints nga ipatungpal dagitoy malaksid kadagiti dadduma a panagpatrolyada kas iti mobile ken motorcycle patrolling.
Kidkiddawen ni PSSupt. Ramil Saculles, City Director ti Baguio City Police Office (BCPO) ti panakibinnadang dagiti amin a maseknan kas kadagiti barangay officials ken ti transport group tapnu saanen a maulit ti dua nga insidente a panakapapatay ti dua a taxi drivers ditoy lokalidad idi napalabas a lawas.
Kinunana a mabalin nga ilabas dagiti drivers ti parapasahero a lugan nangruna dagiti taxi ken van ti luganda iti checkpoint dagiti pulis tapnu mismo a dagiti pulis ti mangkita kadagiti iti pasahero dagitoy.
Kiniddawna met ti tulong dagiti barangay officials iti dagus a panakamonitor dagiti baro a rupa a sumsumrek iti masakupanda a lugar.
Impalawagna a babaen iti daytoy ket dagus a maipasidong dagiti nasao nga indibidual iti interview tapnu sadiay metlaeng a maipalawag a ti nasao a banag ket paset ti panagalerto ti BCPO gapu kadagiti nasao nga insidente.
Dinakamat pay ni Saculles a nabayagen nga awan ti napaspasamak a kaso ti panaghold-up kadagiti taxi drivers isut gapuna a nasken laeng ti panagtitinnulong ti amin tapnu saanen a manayonan dagiti mabiktima iti panaghold-up ken pammapatay iti lokalidad.
