Inikkaten ti China ti visa restrictions para kadagiti residente ti Shenzhen, China a sumarungkar idiay Hong Kong ken mangipalubos iti ad-adu pay a bisita a sumarungak iti Hongkong iti tunggal tawen mangrugi inton Disiembre a uno, iti agdama a tawen, maibasar iti report ti Xinhua idi kalman.
Ti tunggal panagtalinaed ket agingga laeng iti pito nga aldaw bayat a ti addaan ti multiple-entry visa ket balido iti makatawen iti tunggal gundaway.
Ti pablaak ket tapno maisubli ti multiple-entry policy manipud idi 2009 a nainget idi 2015 idi rinugian ti China a pinalubosan dagiti residente ti Shenzhen nga agturong idiay Hong Kong maminsan laeng iti makalawas.
Ti nainget a pagalagadan ket addaan panggep a mangpabassit iti pungtot idiay Hong Kong gapu kadagiti negosiante nga agbiahe agingga iti sumagmamano a gundaway iti tunggal aldaw tapno gundawayanda ti nababbaba a buis babaen ti panaggatangda kadagiti tagilako a mailako manen iti mainland.
Sigun iti Hong Kong, ti pannakairugi manen ti ad-adda a “lenient entry policy” ket manamnama a makagunggona iti sumagmamano nga industria a mainaig iti turismo kas iti retail ken catering.
