Nagballaag ni City Budget Officer Leticia Clemente a ti agtultuloy a krisis iti lana ket mabalin a mangitunda iti panagbaba iti kita manipud iti buis iti sumaruno a tawen, a posible a makaapektar iti panaggastos iti lokal ken iti nasional government.
Sigun kenni Clemente, immuna a narikna ti sektor iti transportasion ti epekto, ngem dimmanon metlaeng dagitoy kadagiti kangrunaan a gagatangen ken iti sektor iti agrikultura.
Impaganetgetna a nu agbayag ti krisis, mabalin a pakapsutenna pay ti ekonomia ken mapapaba ti koleksion iti buis, a mabalin a mangpilit iti lokal a gobierno a baliwan dagiti budget.
Kinunana metlaeng a dakkel ti agbalin nga epekto daytoy iti buis kadagiti negosio, ken manamnama a makita ti epekto iti sumaruno a tawen nu nagbayaden dagiti kompania maibasar iti operasion iti agdama a tawen.
Iti baet daytoy, manarimaan a maipatpataray ti Baguio City iti budget a P3.6 bilyon, a nangatngato nu idilig iti P3 bilion idi napalabas a tawen.
Mangnamnama ni Clemente a kumapoy ti global crisis iti lana tapno makabawi dagiti negosio ken tumibker manen iti panaggastos dagiti gumatgatang.
Pormal a mangrugi ti proseso iti panagsagana iti budget inton Hulyo babaen iti panangiruar iti panawagan para iti singasing. Nu dumanon iti katengngaan iti Oktubre, maisubmitir ti singasing a budget iti lokal a City Council para iti deliberasion.
Impaganetget dagiti opisial a napateg nu maaprobaran ti budget iti umno nga oras tapno maliklikan ti panagaramat iti reenacted budget, a mabalin a mangitunda iti pannakaitantan dagiti proyekto ken makaapektar iti panangipaay iti kangrunaan a serbisio kadagiti residente.
