Agtultuloy ti panagbantay dagiti opisyales sadiay City Camp Lagoon, Lower Rock Quarry, Baguio City tapno masigurado a saan a mapasamak manen ti napasaran idi napalabas a panaglayos.
Iti panakiuman ti Bombo Radyo kenni Silvino Cominga Jr., kapitan ti Lower Rock Quarry, Baguio City, kinunana a bassit ti basura a nasagat iti screen iti lagoon rason nga agyamyaman daytoy iti publiko.
Daytoy ket pamaneknek a naeducate dagitoy maipapan iti panangimanehar iti basura dagitoy.
Kinuna ni Cominga Jr., rotation ti panagbantay dagitoy iti City Camp Lagoon kasta met a nakasagana dagiti daduma nga opisina ti lokal ti gobyerno a tumulong kadagitoy kas iti City Mobile Force ken City Engineering Office.
Innayon ni Cominga a saan a ngumato ti danum iti siltation dam la ketdi awan ti basura a maipullat iti daytoy.
Kabayatanna, agkolkolektar ladta ti General Services Office iti basura iti siudad ti Baguio iti laksid ti saan a nasayaat a paniempo tapno saan nga umado ti basura nga agreulta iti panakapullat ti silation dam ti lagoon.
