BAGUIO CITY – Sinungbatan ni sigud a PNP-Criminal Investigation and Detection Group chief ken ita ket Baguio City Mayor Benjamin Magalong ti waragawag ni PNP chief Gen. Oscar Albayalde nga awanan daytoy iti integridad.
Immuna iti daytoy, kinuna ni Albayalde a saan daytoy a mamati a ‘man of integrity’ ni Magalong kalpasan a nadamag no mamati a maysa a ‘man of integrity’ ti sigud a dadaulo ti PNP-CIDG.
Iti panakiyuman ti Bombo Radyo Baguio kenni Mayor Magalong, impettengna a saanna a kayat a puntiryaen ni Gen. Albayalde wenno ti karakter daytoy.
Kinunana nga awan ti maaramidanna iti nagbalin a komento ti dadaulo ti PNP.
Innayonna nga awatenna laengen a napasaktan ni Gen. Albayalde gaputa masansan a no mapasaktan ti tao ket mangisawsawang daytoy iti no anya lattan a pannarita.
Sigun kenkuana, iti agdama ket masaksaktan ti PNP chief isut gapuna a saan a nalaka a ma-i-reach-out daytoy.
Maipalagip a sakbay ti panagsango dagitoy iti hearing ti Senado ket linamano ni Mayor Magalong ni Gen. Albayalde.
Immunan a kinuna ni Mayor Magalong nga awan ti motibo ken personal nga isyuna kenni Gen. Albayalde seknan iti nagbalin nga expose-na nangruna ta saan daytoy a nagboluntaryo nga agparang iti hearing ti Senado. (-with Bombo Jordan Tablac)
