![](https://img.bomboradyo.com/baguio/2023/05/New-Project-1-1.png)
BAGUIO CITY-Agtultuloy ti clearing operation iti paset ti Kennon Road kalpasan a narba ti steel bars a maar-aramid nga slope protection.
Gapu iti dayta temporario a naiserra ti nasao a kalsada kadagiti amin a lugan.
Sigun iti Office of Civil Defense Cordillera, saan pay a madalanan ti maysa a paset iti Kennon Road iti igid ti Barangay Camp6 Tuba Benguet gapu iti narba nga steel bars iti maar-aramid nga slope protection project.
Maipalagip a narba ti nasao a paset ti proyekto idi Lunes, May 8, 2023 iti 3:30 ti parbangon.
Gapu iti dayta, nabalakadan dagiti motorista a magnada iti Marcos Highway wenno iti Baguio-Bauang wenno Naguilian Road kas alternatibo a ruta.
Sigun pay iti Department of Public Works and Highways Cordillera , mabalin a magna dagiti light vehicles iti Asin-Nangalisan Road.
Kabayatanna, awan pay ti inkeddeng ti Department of Public Works and Highways Cordillera ti aldaw a mabalin a magna dagiti motorista iti Kennon Road.
Maipalagip a ti Kennon Road ti kaasidegan a ruta paturong idiay Rosario, La Union .