BAGUIO CITY – Nainget ti panangmonitor ita ti Municipal Health Office ken ti Barangay Health Emergency Response Team (BHERT) ti Balili, La Trinidad, Benguet kadagiti pamilya a nakapulapol ti kaunaan a Delta variant iti rehion Cordillera.
Iti interview ti Bombo Radyo Baguio, kinuna ni Mayor Romeo Salda a nagdagus iti maysa a pagtaengan sadiay Sitio Tebteb iti Barangay Balili, La Trinidad ti nasao a pasyente a maysa babai manipud Pudtol, Apayao.
Innayonna a no malpas ti panagmonitor ti BHERT kadagiti nakapulapol ti nasao a pasyente ket posible a mai-lockdown ti Tebteb.
Immuna metten a naamuan a nagpataming ti nasao a pasyente iti Baguio General Hospital and Medical Center.
Kabayatanna, ngumatngato ita ti kaso ti COVID-19 sadiay La Trinidad kalpasan a dimmanonen iti nasurok 4,000 ti pakabuklan a kaso dagitoy iti nasao a sakit idi kalman.
Sigun kenni Mayor Salda, 156 ti aktibo a kaso nga agpapaimbag kadagiti ospital, isolation facility ti munisipyo ken iti provincial triage center bayat a 3,754 ti naimbagan ken 108 dagiti pimmusay.
Innayonna a bassit ti naka-home quarantine ita nupay saanda nga irekrekomendar ti panag-home quarantine gaputa nakitada ti killaat a panagngato dagiti kaso kadagiti pamilya gapu iti panaginnakar iti uneg dagiti pagtaengan.
Sigun pay kenkuana, mairtengan ti panagbantay ken panagsukimat kadagiti border checkpoints a sumrek iti Benguet ken ti panagmonitor dagitoy kadagiti returning OFWs, returning residents ken kadagiti travelers.
