BAGUIO CITY – Inserbi dagiti pulis ti closure order kontra kadagiti dua a pagtagilakuan ti chicken dung sadiay Tili, Shilan, La Trinidad, Benguet.
Nabigbig dagiti agtagikua kadagiti nasao a negosyo a da Franklin Yubos nga addaan ti dua a chicken dung truck ken ni Nora Lagadeo nga addaan ti sangapulo a chicken dung truck.
Sigun kenni PCI Benson Macli-ing, hepe ti La Trinidad PNP, impaulog ni Mayor Romeo Salda ti nasao a pammilin.
Kinunana a naipaulog ti nasao a pammilin gapu iti reklamo dagiti residente iti nasao a lugar kontra kadagiti nasao a negosyo ken naduktalan met laeng nga awanan dagitoy iti kaskenan a permiso.
Dinakamatna nga adda ti Administrative Order a mangipawpawil iti panagilako ti chicken dung wenno rugit ti manok iti masakupan ti munisipyo.
Innayon ni Macli-ing nga agsublida manen sadiay Tili, Shilan tapnu kitaenda ti panagtulnog dagiti maseknan a dealers iti pammilin a nasken a pumanawda sadiay.
