Ipanpannakel ti Commission on Elections iti probinsya ti Abra ti nangato a bilang dagiti rehistrado a botante sadiay.
Iti panakiuman ti Bombo Radyo kenni Atty.Nicasio Jacob, Provincial Election Supervisor iti Commission on Elections-Abra, imbinglayna a ti probinsya ti Abra ti addaan iti kangatuan a bilang dagiti nainayon a registered voters nu idilig kadagiti daduma pay a probinsya iti Cordillera.
Maibasar iti rekord iti nasao nga opisina, nagbalinen a 188, 957 ti bilang dagiti rehistrado a botante iti agdama, nangatngato ngem iti 182, 696 a bilang dagitoy idi 2022.
Innayonna a naannayas ti naipatungpal a filing of Certificate of Candidacy idi laeng bulan iti Oktubre.
Iti agdama,kinuna ni Atty. Jacob a manarimaanen ti koordinasyonda kadagiti election stakeholders para iti 2025 Midterm Elections.
Mainaig it dayta, nakaipatungpaldan iti 34 nga Automated Counting Machine Roadshow iti nasao a probinsya idi December agingga Dec 13, 2024.
Iti sabali a bangir, impeksa ti opisyal a kaaduan kadagiti agngayanay ket nakairehistron iti facebook accountsda ngem adda latta dagiti sumagmamano a saan pay nangipatungpal iti daytoy.
Maysa met a rason nga imbinglay dagiti saan pay a nakairehistro kadagiti facebook accountsda ti saandan a panagaramat iti daytoy bayat nga agkampanyada gapu metlaeng iti nakapsot a koneksyon wenno aksesda iti internet.//Bombo Genzel Depayso
