Iti baet ti pannaka-ikkat ni Alice Guo kas mayor ti Bamban, Tarlac, mabalin latta daytoy a mangipila iti kandidaturana para iti 2025 midterm elections.
Sigun kenni Rex Laudiangco, Spokesperson ti Comelec, nu bilang man mangipila ni Guo iti Certificate of Candidacy para iti aniaman a posisyon ket awatenda latta daytoy.
Inlawlawag ni Laudiangco a ministerial laeng ti trabaho ti Comelec nu sadino obligasyonda nga ag-facilitate iti panangipila ken panagawat iti kandidatura.
Innayonna nga awan ti bileg ti Comelec a mang-reject iti kandidatura ti sigud a mayor nu bilang man kayatna a tumaray iti eleksyon.
Nupay kasta, dinakamat ni Laudiangco a nu adda ti mangipila iti petisyon tapno ikanselar wenno saan nga awaten ti Comelec ti kandidatura ni Guo ket mabalin nga adalenda daytoy ken mabalin nga aramatenda ti nasao a petisyon kas basaran tapno madiskwalipikar ni Guo.
Maipalagip nga inikkat ti Ombudsman ni Guo kas mayor ti Bamban gapu iti grave misconduct nga adda pakainaiganna iti iligal nga operasyon ti Philippine Offshore Gaming Operators.
Nag-epektibo daytoy idi Agosto 13, 2024.
