80% itan a nakasagana ti Commission on Elections-Kibungan para iti umadanin a 2025 Midterm Elections.
Iti panakiuman ti Bombo Radyo kenni Abelardo Lindawan Jr.,election officer iti COMELEC-Kibungan, ur-urayenda laengin dagiti maipatulod a makina, ballot boxes, ken daduma pay nga election paraphernalias manipod Manila.
Kas paset metlaeng iti panagsagana, imbinglay ni Lindawan a maipatungpal ti Municipal Joint Security Control Center(MJSCC) kadwa dagiti kameng iti pulisya.
Sigun iti opisyal, awan pay agingga iti agdama dagiti naireport a naglabsing iti paglintegan iti Commission on Elections kas iti checkpoint ken ti gunban.
Malaksid iti dayta, awan pay ti naobserbaran a nangimuntar kadagiti posters wenno campaign materialsda kadagiti saan a naituding a disso manipod iti wanga-wangan iti masakupan iti Kibungan agingga iti Poblacion nu sadino, sigun kenni Lindawan ket nadalos paylaeng dagiti kalkalsada sadiay.
Nupay kasta, impettengna a masurot latta dagiti nakalanad iti paglintegan iti nasao a komisyon kaspangarigan adda dagiti aglabsing kas iti panakaipaay iti surat wenno paabiso.
Mainaig iti dayta,inaklon met ti opisyal a karit para kadakuada ti pangipaayanda kadagiti maaramat a makina para iti election gapu iti lokasyon dagiti daduma a pagbotosan a kasapulan a pagnain.
Kabayatanna,kinuna daytoy nga iti probinsya iti Benguet ket awan iti problema nu maipanggep iti linak ken kappia para iti umadanin nga eleksyon.//Bombo Rob Dominguez
