Ginuyugoy iti City Engineering Office (CEO) dagiti operator iti taxi a dagos a mangisubmitir iti listaan dagiti drayber tapno mainayon iti subsidy program iti lokal a gobierno.
Iti maysa a media forum a naisayangkat idi kalman, kinuna ni Engr. Amy Gas-ib, dadaulo iti Traffic and Transportation Management Division, napateg ti dagos a panangisubmitir iti listaan tapno mapapartak ti panangiwaras iti tulong pinansial.
Sigun iti nasao nga opisina, dumanon iti 1,500 a drayber laengen ti nailista manipod iti puntiriada a 3,346 beneficiaries.
Inlawlawag ni Gas-ib a malaksid iti subsidia manipod iti national government, nangilatang metlaeng iti kanayunan a pondo ti lokal a gobierno iti Baguio tapno makatulong kadagiti drayber nga agtultultoy a maap-apektaran iti transportasion para iti publiko.
Guygoyuguyen metlaeng iti lokal a gobierno ti kooperasion dagiti operator tapno mapapartak ken “efficient” ti panangiwaras iti subsidia.
Mabalin a mangisubmitir ti listaan dagiti drayber iti opisina iti Engineering Office – Traffic and Transportation Management Division (TTMD) a masarakan iti r Rock Quarry.
Kabayatanna, kinumpirmar ni Baguio City Councilor Edison Bilog, babaen ti pannakiuman iti Bombo Radyo Baguio, a maguygoyugoy dagiti operator a mangisubmitir iti listaan dagiti umno a drayber tapno maipaayan dagitoy iti subsidia.
