Sinuspindir ti Commission on Elections (Comelec) ti panagimprenta kadagiti opisial a balota iti baet ti desision ti Korte Suprema (SC) a mangpasardeng iti poll body gapu iti panangdiskualipikarda kenni sigud a Caloocan City representative Edgar Erice ken dadduma pay manipud iti 2025 national and local elections (NLE).
Ti pannakasuspindir ket naiwaragawag kalpasan a nangisayangkat dagiti kameng ti COMELEC ti panagtaripnong seknan iti addang nu kasona a sumurotda iti pangngeddeng ti Korte Suprema.
Sigun iti nasao nga ahensia, dagosda nga imbilin ti panagsardeng ti panagimprenta kadagiti balota kas paset ti “contingency measures” maipapan iti desision ti nangato a Korte.
Binaliwanda pay ti database dagiti kandidato, election management system (EMS), kasta met ti automated counting machine (ACM) ken ti consolidation and canvassing system (CCS).
Nangipaulog ti SC iti temporary restraining order (TRO) a mangiparit iti Comelec a mangdiskualipikar kenni Erice ken dua pay nga “aspirants” a sigud a naideklara a nuisance candidates.
Nabilin ti poll body nga agkomento iti petision ni Erice iti uneg ti non-extendible period a 10 nga aldaw manipud pannakaawat ti pakaammo.
Immunan a kinuna ni Comelec chairperson George Erwin Garcia nailaksid iti opisial a balota dagiti aspirants nga addaan kaso nga indeklara a pinal ken executory ti Comelec en banc.
Karaman ni Erice, a ti pannakadiskwalipikarna ket pinasingkedan ti poll body.
Kabayatanna, mairaman pay laeng kadagiti balota ti nagan dagiti aspirants nga addaan iti pending decisions.
Nangrugi a nangimprenta ti nasao nga ahensua iti 73 milion a balota a maaramat para iti eleksion idi laeng Enero a sais.
