Nagpalagip ti Commission on Elections (Comelec) kadagiti “local candidates” iti panagkampania dagitoy ita nga aldaw nga agbayag ti uppat a pulo ket lima nga aldaw.
Sigun kenni Commission on Elections chairman Atty. George Erwen Garcia, kasapulan nga agtulnog dagiti kandidato iti pagannurutan para iti eleksion inton Mayo, pakairamanan ti panagusar kadagiti nainkalintegan a “paraphernalia” iti eleksion ken panangikabil kadagitoy kadagiti naituding a lugar laeng.
Dagiti nainkalintegan a paraphernalia iti eleksion ket pakairamana dagiti campaign materials a maitunos kadagiti pagannurotan ti kadakkel daytoy ken panagusar kadagiti materiales a makaay-ayo iti aglawlaw ken “sustainable materials.
Ginuyugoy pay ni Garcia dagiti kandidato a liklikanda ti “vote-buying” wenno panggatang ti botos ken impalagipna kadakuada dagiti dadduma pay a restriksion a kas iti panangipaay iti taraon wenno inumen kadagiti supporters.
Ti panagkampania para kadagiti kandidato iti lokal ket ita nga aldaw agingga Mayo a diez.
Nupay kasta, ti panagkampania ket maipawil inton Abril disi siete wenno Maundy Thursday, Abril disi otso wenno Good Friday, Mayo a onse wenno rabii ti aldaw ti eleksion, ken Mayo a dose wenno aldaw mismo ti eleksion.
Dagiti saan nga agtulnog ket mabalin a mapilaan ti reklamo nga agturong iti pannakadiskwalipikar.
