SABLAN, BENGUET – Binabalaw ni Mayor Alfredo Dacumos Jr. ti concrete barrier ti kalsada a patrabaho ti Department of Public Works and Highways idiay Calot, Sablan, Benguet bayat ti insayangkatna nga inspeksyon itay agsapa, Hulyo 1, 2026.
Iti interview ti Bombo Radyo kenkuana, kinuna nga adda ti naidungpar a lugan iti concrete barrier ti kalsada ngem gapu iti kinaawan iti pundasyon daytoy ket natnag ti lugan.
Impettengna a nu nabaked koma ti naaramid a concrete barrier ket natengngel ti lugan tapno saan a natnag.
Mamati ni Mayor Dacumos a naipatong laeng ti concrete barrier gapu ta awan ti nakitana a landok kas pundasyon idi nangipatungpal iti inspeksyon.
Kinunana a nabilinnan ti Municipal Engineer ken Station Commander ti Sablan, Benguet tapno mangisumiter dagitoy iti report maipapan iti nasao nga insidente.
Impaganetget ti Mayor a nasken a sukimaten ti Department of Public Works and Highways (DPWH) dagiti amin a concrete barriers nu napintas metlaeng ti pannakaaramid dagitoy tapno saan a masayang ti kwarta ti gobyerno.
Kiniddawna pay kadagiti maseknan nga ahensiya a nu adda ti ipatungpalda a proyekto ket makikoordinarda iti lokal a gobyerno tapno mapakaammoan dagitoy.
Manamnama met nga agsurat ni Mayor Dacumos iti Regional Office, District ken National Office ti Department of Public Works and Highways tapno maaksiyonan ti nasao a parikut.//Bombo Cara S. Sacyaten
