BAGUIO CITY – Saan a pabor ni Baguio City Congressman Mauricio Domogan iti panakaaramat ti bersiyon da House Speaker Bojie Dy ken House Majority Floor Leader Sandro Marcos kas basaran iti diskusyon ti House Committee on Suffrage and Electoral Reforms iti panangtalantanda kadagiti 25 a nagduduma a bersiyon ti anti-political dynasty bills para iti konsolidasyon dagiti nasao a gakat.
Sigun kenkuana, nasaysayaat no mai-‘outline’ dagiti amin a nagduduma a bersiyon ti anti-political dynasty bills ken pagbubutosanda no aniya a bersiyon ti adaptarenda.
Kinunana a nasaysayaat daytoy tapno naparpartak a maisakad ken maliklikan a maipaayan iti sabali nga interpretasyon no maipangpangruna a maaramat ti bersiyon ti House Speaker ken Presidential son iti diskusyon ti komite.
Immuna iti daytoy, inaramat ti komite ti bersiyon da Dy ken Sandro kas kangrunaan a basaran dagitoy iti panagrugi ti panangtalantanda kadagiti nasao a gakat.
Innayon ni Domogan a mabalin met nga i-consolidate ti kongreso dagiti agduduma a bersiyon ti gakat ngem pagbubutosanda ti tunggal isyu tapno marisut ti aniaman a pagdudumaan dagitoy.
Sigun kenkuana, adu dagiti pagdudumaan dagiti bersiyon ti anti-political dynasty bill a rumbeng a marisut.
Kinunana a karaman ditoy ti ‘degree of relationships’, agsipud ta ti dadduma ket sakupenna ti 4th degree of consanguinity or affinity, ngem ti kaadduan a bersiyon ket limitado laeng iti 2nd civil degree.
Inlawlawagna a narigat ti 4th civil degree agsipud ta nalawa unay ti saklawenna, ken adu dagiti agkakabagyan iti 4th degree a saan nga agaammo ken agnanaed kadagiti nagduduma a lugar.
Maipalagip nga ti bersiyon ni Domogan ket sakupenna ti 2nd degree.
Sigun pay iti kongresista, ti maikadua a rumbeng risutenda iti kongreso ket no ania ti sakupen ti maibilang a political dynasty.
Kinunana nga iti bersiyon da Dy ken Marcos, mabalin nga aggigiddan nga agkandidato dagiti agkakabagyan la ketdi ta saggaysa iti barangay, siyudad wenno munisipyo, probinsiya ken national.
Ngem kinuna ti mammanday-linteg a saanna a paboran daytoy agsipud ta mabalin met laeng nga agresulta daytoy iti dynasty.
Malaksid iti daytoy, kinunana a maysa pay a karit a rumbeng a risutenda ket no asino ti maawat ti kandidaturana no aggigiddan nga agkandidato ti dua wenno tallo nga agkakabagyan.
Innayonna nga adda ti singasing a ti kaunaan nga mangipila iti kandidaturana ti maawat, ngem kinunana a posible a gundawayan daytoy dagiti kurap a kandidato a mangbayad iti kabagyan ti makitkitada a kapigsaan a kabalubalda iti eleksiyon tapno nasapa nga agipila iti kandidatura ket madiskualipikar ti kalabanda iti pulitika.
Dinakamatna a dagitoy ken adu pay nga isyu ti makagapu a saan a kaskarina ti panangtalantanda iti isyu ti political dynasty. Kinunana a kasla nalaka laeng a panunuten daytoy ngem narigat nga aramiden.//Bombo Alfred S. Pudsoc
