Dumanon iti agarup lima pulo nga ahensiya ti nasyunal a gobierno ti makipaset iti mapadpadaan a Bagong Pilipinas Serbisyo Fair caravan a maisayangkat idiay La Trinidad, Benguet.
Ti nasao a programa ket kangrunaan a proyekto ni President Ferdinand Marcos Jr. a maipatungpal intun Abril 21 agingga 22 idiay Benguet State University.
Sigun kenni Benguet Congressman Eric Go Yap,napateg a maipadanun iti publiko ti Bagong Pilipinas Serbisyo Fair Caravan para iti nalaka ken nabiit a panakaiproseso dagiti pagkasapulan ti tunggal maysa kadagiti nagduduma nga ahensiya ti gobierno.
Innayon pay ni Yap a dakkel a pakasaritaan daytoy iti Benguet agsipud ta dagitoy ti kaunaan nga LGU iti Cordillera a mag-host wenno mangsangaili iti nasao a programa ti agdama nga administrasyon.
Ti Bagong Pilipinas Serbisyo Fair ket ti kadakkelan a service caravan iti intero a pagilyan a kangrunaan a pangge na ket maibaba ken maidanun ti serbisyo ti gobierno nangruna dagiti marigrigat nga umili.
Karaman kadagiti flagship programs ti caravan ti Kadiwa ng Pangulo, Passport on Wheels, ken Driver’s License registration/assistance.
Gapu iti daytoy, pinagyamanan ni Cong. Yap da President Bongbong Marcos ken Speaker Martin Romualdez gapu ta dagitoy a mismo ti nangpili iti lugar ken nagasat ti Benguet ta ditoy a maisayangkat ti maikasangapulo ket lima nga edisyon ti caravan.
Dakkel ti maserbisyuan ti Bagong Pilipinas Serbisyo Fair Caravan agsipud ta karaman nga agnumar ditoy dagiti kabangibang a siudad ken probinsya.
Kabayatanna, makipartispar met ditoy ti North Luzon Expressway para iti Radio Frequency Identification (RFID) services nu sadino daytoy ti umuna a gundaway nga adda ti partisipasyon ti pribado a sektor iti caravan.
Adda ti agur-uray a sorpresa kadagiti umili nga agturong iti Bagong Pilipinas Serbisyo Fair nu sadino maigiddan pay ti dakkel a payouts iti cash assistance kadagiti immunan a nabigbig a benepisyaryo.
Kanayunan iti daytoy ket padaanan ti publiko ti panagpabuya wenno entertainment dagiti nalalatak a personalidad ken artista iti concert iti nasao met laeng a lugar./Bombo Jordan Tablac
