Kinuwestunar ti consumer group a Bantay Bigas ti addang ti gobierno a panangimplementar ti P20 tunggal kilo a bagas idiay Visayas, ken kinunanada a mabalin a daytoy ket maysa nga “electioneering tactic.”
Sigun iti pannakangiwat ti grupo a ni Cathy Estavillo, “double digit” ti panagbaba ti trust rating ni President Ferdinand Marcos Jr. isut gapuna a posible a kayatna a pasayaaten ti imatangna ken senatorial slate daytoy tapno maipasigurado ti botos para kadakuada.
Itay laeng kanikadua, kinuna ti Department of Agriculture a mabalinen a magatang ti nalaka a bagas kadagiti napilia a lugar idiay Visayas mangrugi inton sumaruno a lawas.
Nangilatang ti nasional a gobierno ken sumagmamano a lokalidad iti P3.5 billion agingga iti P4.5 billion a subsidy para iti nasao a programa.
Gaputa mailako laeng ti bagas iti P20 tunggal kilo, ipabaklay ti gobierno ti nagdumaan ti presio.
Kabayatanna, inapresiar ti of Free Farmers Cooperative ti motibo iti likudan ti programa, ngem sigun iti nasao a grupo, mabalin a dakkel ti lugi ti gobierno
Kabayatanna, inlawlawag t Malakanyang a ti programa ket maipatungpal idiay Visayas gaputa ad-addu ti demand ti nalaka a bagas ken ad-adu ti suplay ti National Food Authority iti nasao a rehion.
Ngem impasigurado ti Malakanyang a ti programa ket mai-roll out iti intero a pagilian inton tawen 2028.
