BAGUIO CITY – Pappapartaken ita ti Department of Health (DOH) ti contact tracing operations ditoy Cordillera Region kasaruno ti panakaduktal ti 12 a kaso ti UK variant ti COVID-19 sadiay Bontoc, Mountain Province ken maysa a kapada a kaso sadiay La Trinidad, Benguet.
Sigun kenni DOH-Cordillera regional director Dr. Ruby Constantino, rinugian ita nga aldaw dagiti 20 a contact tracers ti Bontoc LGU ti contact tracing kadagiti third generation contacts dagiti 12 a nagpositibo iti COVID-19 UK variant sadiay.
Naituding met nga agturong sadiay Bontoc inton bigat dagiti kanayonan a trained contact tracers a buklen ti sag-sangapulo manipud Ilocos Region, Cagayan Valley, Central Luzon ken ti Cordillera Regional IATF.
Dinakamat pay ni Dr. Constantino a nairekomendar ti panakaipatungpal ti kanayonan a dua a lawas a lockdown kadagiti apektado a barangay sadiay Bontoc.
Iti met interview ti Bombo Radyo Baguio, kinuna ni Bontoc Mayor Franklin Odsey a nagtaud sadiay United Kingdom ti positive case a nabigbig iti Case No. 51 ken naakaran laeng dagiti 11 a kabagian daytoy a dimmar-ay iti reunion dagitoy.
Kinunana a nagnegatibo met ti COVID-19 testing ti nasao nga indibidual idi nakasangpet ditoy pagilian agingga a nakaawid sadiay Bontoc.
Dinakamatna a nakaruaren manipud iti quarantine facility ti nasao a pasyente ken sumagmamano kadagiti kabagian daytoy a naakaran ngem nainget ti panakaiwanwanawan dagitoy.
Gapu iti daytoy, kidkiddawenna ti nainget a panagtungpal dagiti umili ti Bontoc iti basic health protocols ken manamnama ti panakaipatungpal ti kanayonan a pagalagadan.
