Inikkaten ti House Quad Committee (QuadComm) dagiti contempt orders a naipataw kada Alice Guo, Cassandra Ong, Tony Yang, ken Police Major Leo Laraga.
Sakbay a sinuspindir ti joint committee ti panagimbestigarda kadagiti iligal nga aktibidad ti POGO ken ti war on drugs ti naglabas nga administrasion, inaprobaranda amin a mosion para iti pannakaikkat dagiti contempt orders kalpasan a nasegunda amin dagitoy ken awan ti nagkontra a miembro.
Naikkat ti contempt order kontra kenni Guo, ti sigud a Mayor ti Bamban a maaw-awagan metlaeng ti nagan a Guo Hua Ping kalpasan a kinuna ni Abang Lingkod party-list Rep. Stephen Paduano a naibalud metten dagitoy gapu iti kaso dagitoy iti agdama.
Ni Paduano ti nangkiddaw a maikkat ti contempt order dagitoy kontra kada Ong, Yang ken Laraga.
Maipalagip a ni Guo ket na-cite in contempt iti QuadComm idi Setiembre gapu iti panagkedkedna a sungbatan dagiti damag, kasta met kenni Ong ken Yang.
Kabayatanna, ni Laraga ket na-cite in comtempt idi Oktubre gapu iti mapapati a saanna a panagsungbat ti pudno kadagiti damag seknan iti panangiserbi iti search warrant kontra kenni sigud nga Albuera, Leyte Mayor Rolando Espinosa.
Sigun kenni Paduano, inikkatna ti contempt order kontra kenni Laraga gapu iti panagrambak ti Paskua.
Ni Paduano ti maysa kadagiti opisial ti Philippine National Police a nangiserbi ti warrant kontra kenni Espinosa, ken natakuatan a pimmusay bayat a nakabalud daytoy gapu iti kaso a mainaig iti droga idi 2016.
