Kaadwan a lugar iti Rehion Cordillera ti agtaltalinaed iti Green Category iti Commission on Elections bayat nga umadanin ti 2025 Midterm Elections.
Iti panakiuman iti Bombo Radyo kenni Atty. Julius Torres, ti Regional Director iti Commission on Elections-Cordillera, imbinglayna nga iti inisyal nga assessmentda, 66 a lugar iti Cordillera iti karaman iti Green Category, 10 iti Yellow Category, 1 iti Orange Category, bayat nga awan pay iti naipasidong iti Red Category.
Ti agmaymaysa a lugar iti Orange Category iti agdama ket ti Bucay, Abra nga addaan iti rekord iti kinaranggas nga adda pakainaiganna iti eleksyon ken addaan iti history iti nainget a political rivalry.
Inyunay-unay ni Atty. Torres nga ti naalada a datos iti agdama ket insiyal paylaeng ken posible nga agbaliw inton mangrugi ti campaign wenno election period.
Impettengna a saan a rumbeng nga agpakampante nupay awan pay ti nairekord dagiti kapulisan a kaso iti election-related violence iti rehion para iti 2025 Midterm Elections gapu ta mabalin nga agbaliw ti sitwasyon iti anyaman nga oras.
Maibasar iti pagalagadan iti nasao nga opisina, mairaman iti Green Category dagiti lugar a natalged paylaeng kadagiti election-related violence, Yellow Category nu manageable paylaeng ti sitwasyon ken saan unay a nakaro iti political rivalry, Orange Category nu adda ti pakasaritaan ti lugar kadagiti election-related violence ken nu maob-obserbaran iti nakaro a political rivalry, bayat a Red Category met nu talaga a kasapulanen a maipasidong iti kontrol iti Commission on Elections.//Bombo Rob Dominguez
