BAGUIO CITY – Naka-blue alert ita ti Operations Center ti Cordillera Regional Disaster Risk Reduction and Management Council (CRDRRMC) gapu iti bagyo a Domeng.
Sigun kenni Frances Ivy Carasi, information officer ti Office of the Civil Defense-Cordillera nga agserserbi a secretariat ti CRDRRMC, resulta daytoy ti naipatungpal a pre-disaster risk assessment meeting dagitoy idi kalman.
Kinunana a no naka-blue alert ket partially activated ti Operations Center tapnu maipasigurado ti nairtengan a koordinasyon ken panagwanawan dagiti member-agencies para iti aniaman nga insidente a mabalin a mapasamak gapu iti nasao a bagyo ken iti epekto daytoy iti rehion.
Innayonna a nag-epektibo ti nasao nga alert status ti Operations Center ti CRDRRMC iti alas sais ti rabii idi kalman.
Kabayatanna, nupay posible a saan nga ag-landfall ti bagyo a Domeng, kinuna ni Carasi a pakaruen daytoy ti habagat a mangitunda met iti kalkalaingan agingga sagpamingsan a napigsa a tudo agingga iti ngudo ti lawas.
Sigun met iti PAGASA, apektaran ti thunderstorms wenno panaggurruod ken napigsa a tudo ken angin nga addaan napigsa a panagbanesbes ti rehion Cordillera.
