BAGUIO CITY – Nairaman ti Cordillera Region kadagiti uppat a lugar a binilin ti Malacañang a mangimplementar iti naing-inget a COVID-19 health protocols ken quarantine measures tapnu maisardeng wenno makontrol ti panagwaras ti COVID-19 iti masakupan dagitoy a lugar.
Nailanad iti IATF Resolution No. 106 ti pammilin para iti panangipatungpal ti Cordillera Region, Central Luzon, Batangas City ken Quezon iti nairtengan a prevention, detection, isolation, treatment and reintegration measures.
Inlawlawag ti IATF a babaen iti nasao nga addang ket malimitaran ti panaggaraw dagiti tattao ken maksayan ti aniaman a parikut iti panakaduktal ti kaso, contact tracing ken isolation wenno quarantine.
Napalubusan pay dagiti lokal a gobyerno a mangipatungpal kadagiti nga addang kontra iti COVID-19 la ketdi makitada ti pagkasapulan kadagitoy kalpasan ti maisayangkat nga assessment ken iti pammalubos ti maseknan a Regional IATF.
Karaman ditoy ti kalawa ti lockdown a maipatungpal; limitasyon iti inter-zonal mobility ken non-essential travels kadagiti naka-lockdown alugar; aktibo a panangwanawan, panangbigbig ken panang-aksion ti Regional IATF iti tumaod a pagkurangan iti implementasyon ti Prevent, Detect, Isolate, Treat, and Reintegrate Strategy; panangsukimat ti DOLE ken DTI kadagiti pagtrabahuan ken establishimento sakbay iti panangisumitirda iti IATF iti resulta ken action plans; ken panangpapartak iti panakabakuna dagiti maipampangruna a grupo.
