BAGUIO CITY – Nadutukan ti maysa a Police Brigadier General manipud Cordillera kas baro a dadaulo ti pulisya iti Region 9 wenno iti Zamboanga Peninsula.
Itay laeng agsapa ket naangay ti change of command ceremony sadiay Police Regional Office – 9 para iti panagtugaw ni Brigadier General Jesus Dagadag Cambay Jr. kas dadaulo ti 8,000 a pulis iti Zamboanga del Sur, Zamboanga del Norte ken Zamboanga Sibugay pakairamanan dagiti siudad ti Isabela ken Zamboanga.
Naamuan a sakbay ti nasao a posisyon ket nadutukan wenno nagserbi ni Cambay kas direktor ti PNP Intelligence Group idi napalabas a bulan ti Marso ken nagserbi metlaeng kas Deputy Regional Director for Administration ken Deputy Director for Operations ti Police Regional Office – 6 sadiay Western Visayas.
Nagserbi metlaeng daytoy kas commander ti Metro Boracay Task Force sadiay Kalibo, Aklan iti nakappia ken naannayas a rehabilitasyon ti nalatak a Boracay Beach.
Nagserbi pay daytoy kas dadaulo ti Baguio City Police Office ken iti nagduduma nga unit ti pulisya sadiay Region 6, Region 4A, NCR, Highway Patrol Group, Directorate for Intelligence ken Cordillera Region.
Naital-o ni Cambay a tubo ti Lagawe, Ifugao kas one-star general idi Pebrero ita a tawen ken daytoy ket miembro ti PMA MAKATAO Class of 1989.
