BAGUIO CITY – Impaayan ti 5th Infantry Division (ID), Philippine Army iti arrival honor ken funeral mass ceremony ti bangkay ti soldado a taga-Cordillera a pimmusay iti napasamak nga engkwentro iti nagbaetan ti tropa ti gobyerno ken dagiti rebelde a grupo sadiay Villa Rey, Echague, Isabela idi kanikadua.
Naiturong ti bangkay ni Cpl. Adonis Valera a taga Pinukpok, Kalinga iti kampo ti 5th ID, PA sadiay Gamu, Isabela tapnu sadiay a mapadayawan.
Sigun kenni MGen. Pablo Lorenzo, commander general ti 5th ID, PA, saan a matukadan ti impakita a kinabanuar ni Cpl. Valera iti panangsango daytoy kadagiti kalaban.
Kinunana a ti panangisakripisyo ni Cpl. Valera iti biag daytoy ket pammaneknek a nakasagana dagiti soldado a matay para iti pagilian.
Impasigurado met ni Maj. Noriel Tayaban, panakangiwat ti 5th ID, PA a maipaay amin a tulong iti pamilya ti pimmusay a soldado.
Naamuan a ni Cpl. Valera ket Gold Cross Awardee ken karaman kadagiti nakilaban para iti panagwaywayas ti Marawi City idi 2017 manipud iti ima ti Maute Terror Group.
Kabayatanna, agpapaimbag metten iti pagagasan da Cpl. Harold Ganagan ti Tinglayan, Kalinga ken Cpl. Fajardo Manuel ti Paracelis, Mt. Province kalpasan a nadangran dagitoy iti nasao nga engkwentro.
Maipalagip a malem ti Sabado, December 14 ket nakaawat ti militar iti impormasyon seknan iti panagkik-kikil dagiti rebelde sadiay Echague, Isabela ken iti panagresponde dagiti militar ket timmaud ti rinnupak a nagpaut iti 20 a minuto agingga a nagsanod dagiti rebelde.
Agtultuloy ti clearing operations ti tropa ti gobyerno iti nakapasamakan ti engkwentro ken impanamnamada ti saanda a panagsardeng agingga a maanop dagiti nabatbati a kameng ti rebelde a grupo.
