BAGUIO CITY – Malamlamayan ita sadiay Tabuk City, Kalinga ti bangkay ti maysa kadagiti soldado a pimmusay iti engkwentro kabayatan ti panangipatungpalda iti rescue operation para iti panakaispal dagiti dua a babae a pulis a nadukot sadiay Patikul, Sulu itay nabiit.
Sigun kenni Graille Win, maysa ni Seargeant Jordan dela Cruz kadagiti nadangran iti nasao a rinnupak nga immunan a nakatayan ti dua a kakadua daytoy a soldado.
Kinunana a pimmusay ni Seargeant dela Cruz bayat ti panaka-agas daytoy iti ospital gapu iti nakaru a dunor a sinagrap daytoy iti enkwentro kontra kadagiti Abu Sayyaf.
Dinakamat ni Win a kalpasan a malamayan ti bayawna iti dua nga aldaw sadiay Tabuk City ket maiyakar daytoy iti lugarda sadiay Tanudan, Kalinga.
Innayonna nga awan pay ti naituding a petsa para iti panakaitabon ti banuar a soldado agsipud ta uraenda pay ti manang daytoy manipud sadiay Germany.
Umap-apela met daytoy iti kararag manipud iti publiko para iti panakaliwliwa ti pamilya ti napasag a soldado, nangruna ti asawa daytoy ken ti dua nga annakna nga agtawen iti tallo ken pito a bulan.
