Imbilin ti Court of Appeals ti panakafreeze dagiti bank accounts ken personal assets ni suspended Bamban, Tarlac Mayor Alice Guo kasta met da Zhiyang Huang ken Baoying Lin gapu iti maatap a pakainaiganda iti iligal nga aktibidad ti Philippine offshore gaming operation.
Sigun iti Anti-Money Laundering Council (AMLC), in-isyu ti Court of Appeals ti resolution idi Miyerkules kalpasan a nangipila dagitoy iti petisyon para iti freeze order.
Kinuna ti Anti-Money Laundering Council (AMLC) a da Huang ken Lin ket maatap a karaman kadagiti human trafficking ken fraudulent nga aktibidad kadagiti entity a Zun Yuan Technology Inc., BAOFU Land Development Inc., ken Hongsheng Gaming Technology Inc.
Innayon ti Anti-Money Laundering Council (AMLC) a ti freeze order ket buklen ti 90 a bank accounts kadagiti 14 a financial institutions, dagiti real estate properties ken high-value personal properties a pakairamanan dagiti luxury vehicles ken helicopter.
Panggep ti freeze order a maprebentaran ti panakailako dagiti assets bayat a manarimaan ti imbestigasyon kadagitoy.
