BAGUIO CITY – Ad-adda pay a nairtengan ti panakaipatungpal ti linteg iti social wenno physical distancing sadiay Canada kasaruno ti ad-adda a panagngato ti kaso ti COVID-19 iti North America.
Iti report iti Bombo Radyo Baguio ni Bombo International Correspondent Jogin Tamayo manipud Winnipeg City, Canada, naamuan a saan itan a panag-allukoy iti publiko ti ar-aramiden ti gobyerno sadiay sekbnan iti panagsurot iti social distancing.
Dinakamatna a nangrugin ti panagkemmeg dagiti otoridad kadagiti indibidual nga agpaspasyar kadagiti parapubliko a lugar ken namulmulta dagiti makemkemmeg iti dumanon 400 Canadian dollars a katukad ti dumanon P15,000.
Innayonna nga awan ti linteg para iti kapilitan a panagisuot ti facemask sadiay isut gapuna nga al-allukuyen laeng ti gobyerno ti Canada dagiti residente sadiay iti panag-aramatda iti nasao a protective equipment kontra iti COVID-19.
Maipawpawil metlaeng ti carpooling sadiay Canada ken mamulta dagiti maduktalan a nangilugan iti saanda a kapinpin-ano wenno kadwa iti uneg ti pagtaenganda.
Dinakamat ni Tamayo a nakanselar ti school year ita sadiay Canada ken inton Setyembre ti sumaruno a serrek nupay agtultuloy ti panakaited ti asignatura kadagiti estudyante babaen iti online wenno internet.
Nanayonan pay ti benipisyo dagiti residente sadiay Canada nga apektado iti COVID pandemic gaputa ti gobyernon sadiay ti mangbayad iti uppat a bulan nga abang dagiti agab-abang.
Maibasar iti kaudian a datus, dumanon iti 26,000 dagiti nagpositibo a kaso ti COVID-19 sadiay Canada bayat a dumanon iti 780 dagiti pimmusay gapu iti nasao a sakit.
