BAGUIO CITY – Natiliw ti maika-siyam a COVID-19 quarantine checkpoint violator iti deppaar ti Irisan, Baguio City idi kanikadua.
Nabigbig daytoy a ni Jayson Legaspi Pangilinan, 31-anyos ken residente ti Rizal Street, Cabanatuan City, Nueva Ecija.
Maibasar iti report ti Baguio City Police Office – Station 9, agsapa ti Sabado, October 31 idi pinara dagiti pulis a mangimanmando iti quarantine checkpoint sadiay Naguillian Road, Irisan ti lugan ni Pangilinan tapnu sukimaten ti travel documents daytoy.
Nupay kasta, napaay daytoy a mangiparang kadagiti orihinal a kopya dagiti iggemna a dokumento.
Dagus nga inberipikar dagiti pulis dagiti dokumento manipud kadagiti nakalanad a nagtaudan dagiti dokumento.
Nupay kasta, pinaglibakan dagiti maseknan a personnel ti Cabanatuan City Health Office ken Cardinal Santos Medical Center dagiti nasao a dokumento ken kinunada nga awan ti impapaayda a sertipikasyon kenni Pangilinan.
Kinomprontar ti pulisya ni Pangilinan ken sadiay nga inaklonna a peke dagiti nasao a dokumento.
Naiturong metten ti nasao nga indibidual iti istasyon ti pulisya bayat a maur-uray ti resulta ti swab test daytoy sakbay ti panakaipisokna iti pagbaludan.
Sumangsango ita ni Pangilinan iti kaso a panagaramat ti falsified documents ken panaglabsing iti RA 11332 wenno ti Mandatory Reporting of Notifiable Diseases and Health Events of Public Health Concern Act.
