BAGUIO CITY – Manayonanen ti COVID-19 testing capacity ti Molecular Laboratory ti Benguet General Hospital (BeGH).
Kasaruno daytoy ti panagawatda iti maysa nga yunit ti RT-PCR machine nga addaan ti laptop, AVR ken UPS nga indonar ni Benguet Caretaker Eric Yap idi kalman.
Sigun kenni BeGH Chief of Hospital Dr. Meliarazon Dulay, dakkel a tulong ti nasao a kagawaan tapnu manayonan pay ti bilang dagiti specimens a mabalin nga iproseso ti molecular lab iti innaldaw.
Kinunana a gapu iti baro a kagawaan ket agbalinen a 300 nga specimens ti COVID-19 swab test ti maiproseso ti laboratoryo iti innaldaw.
Maipalagip a maysa laeng nga RT-PCR machine ti ar-aramaten ti molecular lab ti BeGH a pakaiturturongan dagiti specimen manipod kadagiti munisipyo iti probinsia ti Benguet.
Kabayatanna, imbinglay ni Dr. Dulay a nalpas metten ti panagsanay dagiti sumagmamano a medical technologists a posible a tumulong iti operasyon ti nasao a pagagasan.
