BAGUIO CITY – Naksayan ti crime rate ti munisipyo ti Itogon, Benguet iti umuna a kwarter ti agdama a tawen.
Segun kenni PCI Eugene Raymundo, dadaulo ti Itogon Municipal Police Station, sangapulo ket maysa laeng a kaso ti nailista dagitoy iti umuna nga tallo a bulan ti agdama a tawen.
Kinunana a kangrunaan paylaeng a kaso a nailista dagitoy ket ti panagtakaw kadagiti babbalay, phyical injuries ken vehicular traffic incidents.
Inayonna a kangrunaan pay laeng a rason ti aksidente sadiay ket ti pakillo-killo a kalsada.
Malaksid iti daytoy, kinunana a maysa metlaeng kadagiti parikut dagitoy ket ti iligal parking.
Impettengna a gapu iti umad-adu a bilang dagiti lugan ket inkapilitan nga agparada kadagiti kalkalsada sadiay dagiti tattao nangruna no awanan dagitoy iti parking lot.
Impakaamona met a nainget ti panagbantay dagitoy iti intero a munisipyo gapu iti umad-adu a bilang dagiti turista a sumarsarungkar sadiay nangruna kadagiti resort ken bambantay sadiay.
