BAGUIO CITY – Pimmusay ti maysa a criminolgy student bayat a nadangran ti kabsatna kalpasan a pinalpaltogan dagitoy dagiti saan pay a nabigbig a suspek sadiay Domaoal Street, Zone 6, Bangued, Abra idi rabii.
Nabigbig ti pimmusay a ni Sean Shendrick Lapesura Baro, 18, bayat a ti kabsatna ket ni Dino Lapesura Baro, agpada a residente ti Macray, Tayum, Abra.
Maibasar iti inisyal nga imbestigasyon ti Bangued PNP, nakalugan dagiti biktima iti motorsiklo ket paturongda iti Sta. Rosa, Bangued, Abra idi pinalpaltogan dagitoy dagiti suspek iti sangoanan ti Jannsen Hall Building.
Nakaadayo pay ti motorsiklo dagitoy ngem naidungparda iti igid ti kalsada.
Intaray dagitoy dagiti pulis iti Abra Provincial Hospital ngem naideklara a dead on arrival ni Sean Shendrick gapu iti sinagrapna a dua a tama ti paltog iti bagina bayat a naipasidong iti operasyon ni Dino Baro gapu iti sinagrapna a tallo a tama ti paltog.
Iti met panangiproseso ti SOCO iti crime scene ket nakarekoberda iti lima a basyo ken maysa a buli ti caliber 45 a paltog.
Dukduktalen pay laeng dagiti otoridad nu anya ti motibo ken nu asino dagiti suspek iti nasao a krimen.
