Agkasapulan ita ti Croatia iti rinibribu a pinoy caregiver.
Daytoy ket kalpasan a nagpinnirma ti Pilipinas ken Croatia iti Memorandum of Cooperation.
Sigun iti Department of Migrant Workers (DMW), posible a dumanon iti 1,000 euros wenno P62,000 ti minimum a sweldo tunggal bulan.
Dinakamat ti ahensiya a saan pay a karaman ditoy ti overtime pay ken dadduma pay a benepisyo.
Innayon ni Department of Migrant Workers Undersecretary Patricia Yvonne Caunan a plano ti Croatia a mangilukat iti 18 senior care facility ken kayatda a Pilipino caregivers ti alaenda.
Impetteng ni Caunan a kadawyan a parikut idiay Central ken Eastern Europe ket ti illegal recruitment scheme kadagiti Pilipino.
Gapu iti daytoy, nagpalagip manen ni Caunan iti publiko nangruna kadagiti kayatna nga agtrabaho iti ballasiw-taaw a saanda a dagus a mamatmati kadagiti hiring iti social media.
Impeksana a dagiti Pilipino a kayatna nga agtrabaho idiay Croatia ket agaplikarda mismo iti opisina ti Department of Migrant Workers.
