BAGUIO CITY- Nalimitaran ti bilang dagiti aktibidad a maipatungpal kabayatan ti tinawen a pannakarambak ti Christmas in Baguio gapu iti agdama nga pandemya.
Kinuna ni City Tourism and Special Events Office head Engr. Aloysius Mapalo a malaksid iti naipatungpal a pannakapasilaw ti Christmas Tree sadiay Session Road idi Disiembre 1 ket ti laeng sumaruno a pagsaganaan ti lokal a gobierno ti New Year’s Eve countdown.
Inyunay-unay ni Engr. Mapalo a paset daytoy ti addang ti lokal a gobierno kontra iti pannakaipatungpal dagiti crowd-drawing events wenno panag-uurnong tapnu malapdan ken maksayan ti panagwaras ti virus.
Inlawlawagna nga adda dagiti aktibidad nga inisyatibo dagiti pribado nga organisasyon ken agtalinaed kas special features ti Night Market ken Session Road Sunday Showcase.
Immunan a kinuna ni City Administrator Eng. Bonifacio Dela Peña nga agbalin a memorable latta ti CHristmas in Baguio ita nga tawen iti baet a limitado dagiti aktibidad.
Mangnamnama pay dagitoy nga COVID-free wenno nababa laeng ti kaso a mailista ti siudad kabayatan ti selebrasyon ti Paskua.
Gapu iti daytoy, maipalpalagip latta iti publiko ti agtultuloy ken nainget a panagtulnog kadagiti maipatpatungpal nga minimum public health standards.
