BAGUIO CITY – Naapektaran manen dagiti agmulmula ken agilaklako ti cutflowers iti probinsia ti Benguet kasaruno ti panakaipatungpal dagiti nairtengan a pagalagadan gapu iti panagngato manen dagiti kaso ti COVID-19.
Iti interview ti Bombo Radyo Baguio, imbinglay ni Andy Colte, maysa a Siyentistang Magsasaka on Cutflowers a marigatanda manen a mangilako ken mangibihe kadagiti produktoda a sabong kagiddan ti panakaipasidong ti Metro Manila ken ti Cordillera iti Alert Level 3.
Sigun kenkuana, adu a sabong ti saanda a mailaklako ita nangruna sadiay Metro Manila a kangrunaan a pakaiturturongan ti apitda nangruna ta naksayan dagiti buyers kasaruno ti panagrikep ti adu a pwesto ti sabong sadiay.
Dinakamatna a gapu iti agdama a sitwasyon ket naksayan iti agingga 50% ti panagbaba iti presyo dagiti sabong.
Inyunay-unayna met nga awan ti panagkurang iti suplay ti sabong nangruna iti masungad nga Aldaw dagiti Puso.
Kabayatanna, mangnamnama latta dagitoy a matungpal ita a tawen ti inkari ti gobyerno babaen ti Department of Agriculture a pondo a mailatang para kadagiti agilaklako ken agmulmula ti cutflowers a naapektaran iti agtultuloy a pandemya.
