Impakaamo ni sigud a Davao City chief information officer ken complainant Jefry Tupas a saan a maipapan ti politika ti naipila a kaso kontra iti aktibista ken sigud a vice presidential candidate a ni Walden Bello.
Iti 12-panid a komento a naipila iti Korte Suprema, kinuna ni Tupas nga awan ti pagduaduaan a mangpabasol dagiti statement ni Bello kontra kenkuana.
Ti komento ket kasaruno ti impila ni Bello a mangsapsapul a mangideklara a saan a maitunos iti konstitusion ti Artikulo 353 agingga iti 355 ti Revised Penal Code ken Artikulo 4(c)(4) ti Republic Act 10175 wenno ti Cybercrime Prevention Act of 2012.
Ni Bello gamin ket sumangsango iti kaso a cyber libel nga impila ni Tupas.
Ti kaso ket nagtaud manipod iti kinuna ni Bello a nagaramat ni Tupas ken dagiti gagayemna iti iligal a droga nga aggatad ti P1.5 million bayat ti beach party dagitoy.
Ngem inlawlawag ni Tupas nga immikkat daytoy iti party kalpasan a nangan sakbay a nakumpiskar ti Philippine Drug Enforcement Agency ti iligal a droga nga aggatad ti P1.5 milyon.
Maipalagip a ni Bello ket kandidato ti kina-bise presidente idi 2022 national elections iti sidong ti Partido Lakas ng Masa ken nagserbi pay daytoy kas party-list representative manipod 2009 agingga 2015.
