BAGUIO CITY – Dumanon iti P488,000 ti nailista a danyos iti agrikultura sadiay Atok, Benguet gapu iti mapaspaaran a tikag.
Iti panakiyuman ti Bombo Radyo kenni Atok Municipal Agriculturist Cheryl Sano, kinunana a sumagmamano a mannalon sadiay Barangay Topdac ti nag-report iti opisinada mainaig iti panaka-apektar dagiti mula dagitoy a repolyo ken patatas gapu iti tikag.
Dinakamatna a naudi a nangisayangkatda ti crop damage assessment iti umuna a lawas ti Marso.
Pinaglibakanna met ti alegasyon ti grupo dagiti mannalon ti Benguet a napaay dagiti Municipal Agticulturist Offices nga agrikos kadagiti garden dagiti mannalon iti probinsia tapnu agsukimat iti agdama a kasasaad dagiti mula a posible a naapektaran iti tikag.
Naamuan a kinuna ti nasao a grupo nga awan ti nakagteng a report iti Department of Agriculture (DA) – Cordillera mainaig iti crop damages dagiti highland vegetables ditoy Benguet.
Gapu iti daytoy, iyap-apelana kadagiti mannalon a saan dagitoy nga agdiretso nga agreport iti DA-Cordillera gaputa saan a dagitoy ti mangipatungpal iti validation.
Inlawlawagna a barangay ti umuna a pangipanan dagiti mannalon iti report dagitoy tapnu maipaka-ammo iti Municipal Agriculture Office a mangipatungpal ti crop damage assessment ken maipatulod met ti datus iti Benguet Agriculture Office para iti consolidation dagiti report agingga a maisumitir iti DA-Cordillera ti pinal a report. -report from Bombo Jorton Campana
