Kidkiddawen dagiti dadaulo iti Catholic Church iti lokal a gobierno iti Baguio City nga ipawil dagiti “adverstisement” wenno patalastas a mangitantandudo iti amin a kita iti panagsugal iti siudad.
Ad-adda nga impaganetget manen iti Baguio City Ecumenical Council ti nabayag daytoy a takder kontra iti panagsugal gapu iti saan a nasayaat nga epekto daytoy kadagiti indibidual, pamilia ken komunidad.
Iti petision nga insurat ni Episcopal Rev. Genesis Mark Langbao, ti panagsugal–kasta metten iti casino, bingo hall, online platforms, mobile apps, ken dadduma pay a digital a wagas—ket mangituntunda iti peggad a kas iti pannaka-adik, pannakalugi iti kuarta, pannakapirdi iti pamilia, panagbalin a vulnerable iti agtutubo, ken saan a nasayaat a komunidad.
Naiyebkas metlaeng ti panagdanagda kadagiti simbaan iti panagadu dagiti patalastas iti panagsugal iti parapubliko ken “digital space” a mapapati a mangpaspasayaat iti ideya a nalaka ti panagbaknang ken mangpunpuntiria iti agtutubo ken kadagiti pamilia a nakurapay.
Idi Marso a dos, tinalantan dagiti konsehal iti siudad ti maysa a singasing nga ordinansa a mangipawpawil kadagiti street advertisement a mangitantanduo iti panagsugal.
Maysa kadagiti isyu a nadakamat kadagiti sponsor iti singasing ti pannakipaset kadagiti kompania nga electronic gaming iti Baguio Flower Festival ita a tawen, karaman ti maysa nga online bingo company a nakipaset iti Grand Float Parade ken naaddaan iti booth iti “Session Road in Bloom.”
Immuna metten a nagkiddaw iti City Council a repasuen dagiti operasion iti sugal nga inaprobaran ti konseho.
Kabayatanna, guyguyugyyen ti Baguio Character City Council dagiti barangay a saan nga agaramat iti panagsugal kas wagas iti panangala iti pondo, gaputa saan nga otomatiko a kayatna a sawen nga “ethical” daytoy numan pay ligal.
