BEIRUT, LEBANON -Pimmusay ti dadaulo ti Hezbollah a ni Sayyed Hassan Nasrallah, kalpasan iti Airstrike ti Israel idiay Beirut, Lebanon.
Sigun kadagiti Militar ti Israel, pimmusay ni Nasrallah iti panagraut dagitoy kadagiti grupo iti Hezbollah iti central command headquarters dagitoy sadiay Beirut.
Kinompirmar ti Hezbollah ti ipupusay ti dadauloda ngem saanda a nangipaay iti kanayonan nga impormasion maipapan iti ipupusay daytoy.
Karaman kadagiti napapatay ti sabali pay a kangatuan a lider ti Hezbollah a ni Ali Karaki, ken dadduma pay a komander.
Iti baet ti ipupusay ti dadaulo ti Hezbollah, kinunada nga ituloyda latta ti laban kontra iti Israel.
Nangipaulog met ti Hamas ken dadduma pay nga alyado ti Hezbollah kadagiti statement a makipargikna iti ipupusay ni Nasrallah.
Sigun iti Israeli Defense Minister a ni Yoav Gallant, ti gubat ti Israel ket saan a kadagiti tattao ti Lebanon ken inawaganna ni Nasrallah a mammapatay kadagiti rinibu nga Israeli ken ganggannaet nga indibidual.
Kabayatanna, kinuna ti grupo iti Hezbollah nga agsardeng laeng ti gubat no sardengan iti Israel ti Gaza.
