Impeksa ni Mike Cabangon iti Kilusang Mayo Uno Cordillera a saan nga umdas ti P85 a wage increase kadagiti mangmangged idiay National Capital Region (NCR), gaputa agtultuloy latta ti panagngato dagiti presio dagiti kangrunaan a pagkasapulan dagiti umili.
Iti pannakiuman iti Bombo Radyo, imbinglayna a P1,200 ti umdas a sueldo iti tunggal aldaw tapno maaddaan iti naan-anay a pangbiag dagiti mangmangged iti pagilian.
Inlawlawagna pay, a maibasar iti datos iti World Bank, nga uray no nagparang a dimakkel ti Gross National Income ti pagilian, saan met a mangipakita daytoy iti nalinteg a panakabingay ti kita kadagiti mangmangged.
Impettengna a nu maipateg kuma dagiti mangmangged iti Pilipinas a kas iti dadduma a pagilian, dagitoy ti mangituloy iti produksion ken panagdur-as iti ekonomia.
Impeksana pay a masapul a nakabasar iti panagngato iti inflation ti amin a panagngato iti sueldo tapno maaddaan dagiti umili iti naan-anay a pagbiagan.
Namnamaen met ni Cabangon a denggen ni President Ferdinand Marcos Jr. ti panawagan dagiti mangmangged ken maipatungpal ti P1,200 a national living wage tapno maipaay ti umno a biag dagiti trabahado imbes a dagiti dadakkel a kapitalista laeng ti maipangpangruna. |via Bombo Khey Reparip
