Impeksa ni Mike Cabangon, lider ti Kilusang Mayo Uno Cordillera a saan nga umdas ti P85 a wage increase kadagiti mangmangged idiay National Capital Region (NCR), gapu ta agtultuloy latta ti panagngato dagiti presyo dagiti kangrunaan a pagkasapulan dagiti umili.
Iti pannakiuman ti Bombo Radyo, imbinglayna a P1,200 ti umdas a sweldo tapno maaddaan iti nasayaat a panagbiag dagiti mangmangged iti pagilian.
Inlawlawagna met nga uray dimmakel ti Gross National Income ti pagilian kas maibasar iti datus ti World Bank, saan met a mangipakita daytoy iti nalinteg a pannakabingay ti kita para kadagiti mangmangged.
Sigun kenkuana, nasken a maipateg ken mabigbig dagiti mangmangged iti pagilian a kas iti ar aramiden dagiti dadduma a pagilian gapu ta isuda ti mangitultuloy iti produksyon ken panagdur-as ti ekonomiya.
Impeksana pay a masapul a nakabase amin a panagngato ti sweldo iti panagngato ti inflation tapno maaddaan dagiti umili iti naan-anay a pagbiagan.
Namnamaen met ni Cabangon nga ipangag ni President Ferdinand Marcos Jr. ti panawagan dagiti mangmangged ken maipatungpal ti P1,200 a national living wage tapno maipaay ti umno a biag kadagiti mangmangged ken saan a dagiti dadakkel a kapitalista laeng ti maipangpangruna.//BomboKhey
