Insingasing ni Senate Committee on Agriculture, Food, and Agrarian Reform Chairman Senador Francis “Kiko” Pangilinan a maiyakar iti Libreng Almusal Program dagiti daduma a pondo a nailatang para kadagiti flood control projects.
Sigun kenni Senator Pangilinan, makatulong daytoy tapno marisut ti kumarkaro a kaso ti stunting ken malnutrition kasta metten ti ngumatngato a bilang dagiti agsarsardeng iti panagadal tapno laeng tumulong kadagiti nagannakda nga agtrabaho.
Malaksid iti dayta, impetteng ti senador a babaen iti panangipaay iti libre a taraon wenno pammigat kadagiti agad-adal iti Kindergarten agingga Senior High School ket makatulong tapno mapangato ti attendance ken learning capacity dagiti estudyante.
Iti sidong ti nasao a singasing, kagudwa iti budget para iti programa a Libreng Almusal ket maaramat a paggatang iti taraon manipod kadagiti lokal a mannalon ken mangngalap tapno masigurado a presko ken nasustansya ti kanen dagiti estudyante.
