Naaprubahan na ang dagdag na dalawang piso sa pamasahe ng mga traditional at modernized jeepney sa Baguio City at Benguet.
Pinag-usapan ito ng iba’t ibang ahensya, kabilang ang Department of Transportation o DOTr, Land Transportation Franchising and Regulatory Board o LTFRB, City Engineering Office, City Administrator, mga stakeholder, at iba’t ibang transport cooperative at korporasyon.
Ang naturang dagdag-pasahe ay itinuturing na temporary voluntary fare increase.
Sa panayam ng Bombo Radyo Baguio kay Wilson Bunmay-et Jr., Jeepney Federation President ng Baguio-Benguet, sinabi nito na kakaunti umano ang mga driver na bumibiyahe kapag hindi nadadagdagan ang pamasahe.
Dagdag pa ni Bumay-et, ipinaabot at ipinaalam na nila ang kanilang kahilingan sa mga kapitan ng barangay at mga konsehal ng iba’t ibang munisipyo.
Samantala, para sa mga special trip o espesyal na biyahe, kinakailangan umanong magsumite ng board resolution mula sa barangay, joint resolution ng mga barangay, o resolusyon mula sa transport cooperative o corporation, na ilalakip sa mga dokumentong isusumite sa LTFRB.
Samantala, bukas naman ang tanggapan ng Land Transportation Office o LTO para sa mga reklamo ng mga pasahero, partikular na kung may insidente ng pang-aabuso o paniningil ng labis na pamasahe ng mga driver. | via Bombo Syra Calion
