BAGUIO CITY – Makidkiddaw iti publiko ti dagus a panagtawag dagitoy kadagiti kaasitgan nga istasyon ti pulisya ken kadagiti opisina ti Explosive Ordnance Disposal iti Rehion Cordillera apaman a makadiskubreda ti vintage bombs a saan pay a bimtak.
Iti panakiuman ti Bombo Radyo kenni Police Major Errol Longtoy, Officer-In-Charge iti Regional Explosive Ordnance Disposal and Canine Unit, ad-adda a narisgu dagiti vintage bomb a madisdiskubre iti agdama gapu ta saanen nga “stable” ti kasasaad dagitoy nu sadino mabalin a kellaat a bumtak uray iti minimal laeng a panakagarawna.
Sigun kenni PMaj. Longtoy, dagiti madisdiskubre a vintage bomb kas iti general purpose bomb ken drop bomb ket naaramid pay idi World War 2.
Maibasar iti rekord ti nasao nga opisina, addan ti dua a vintage bomb a naidispose dagiti otoridad iti umuna a lawas ti Hunyo ita a tawen nu sadino agpada nga agdagsen iti 1000-Pounds ken nadiskubre sadiay Sablan ken Mankayan.
Malaksid iti dayta, adda metten ti maysa a pimmusay idiay Sablan gapu iti pananglukatna iti nadiskubre daytoy a vintage bomb.
WE DID HAVE AN INCIDENT NA NANGYARI…MAY RECOVERY SILA, INUWI SA BAHAY. uNFORTUNATELY,SINUBUKAN BUKSAN E SUMABOG YUNG UNEXPLODED ORDNANCE DOON SA SABLAN. UNFORTUNATELY, HINDI NAKASURVIVE YUNG ANO, YUNG NAGBUKAS.
Kagiddan dayta, inlawlawag ni PMaj. Longtoy a saan nga agpayso ti pammati a naglaon ti balitok dagiti marekrekober a vintage bomb rason a maiyunay-unay iti publiko ti panangisurrender kadagitoy para iti umno a disposisyonna.
Mainaig iti dayta, mabalin a mapilaan ti kaso dagiti indibidwal a maulit-ulit nga aglabsing iti pagannurotan seknan ti iligal a panagtagikua kadagitoy.
Agingga iti agdama ket nainget ti panangupay dagiti otoridad iti panangidulin kadagitoy gapu iti pangta a maipaayna iti publiko.//Bombo Rob Dominguez
