BAGUIO CITY – Ngimmato ti daily attack rate ti COVID-19 a nailista sadiay Bokod, Benguet manipud idi napalabas a bulan ti Hunyo agingga ita a bulan ti Hulyo.
Sigun kenni Mayor Thomas Wales Jr., dimmanon iti 8.6% ti daily attack rate dagitoy no sadino, 115 ita ti pakabuklan a kaso a nailista sadiay ken manipud iti nasao a bilang ket 95 dagiti naimbagan ken 18 dagiti aktibo a kaso a naka-isolate ita kadagiti insaganada nga isolation facilities ken iti Benguet General Hospital.
Gapu iti daytoy, kinunana nga iti panakaipasidong ti Benguet iti Modified GCQ ket nasken a nainget latta a masurot dagiti minimum helth standards tapnu saanen a manayunan pay ti bilang dagiti makaptan ti COVID-19 sadiay ken saanen nga agwaras ti nasao a sakit.
Kiniddawna metlaeng nga iti baet ti panakapalukay dagiti pagalagadan ket nasken a maliklikan latta dagiti panagurnong sadiay ken no mabalin ket masuspindir nangruna no saan unay a napateg tapnu maliklikan ti panaka-urning dagiti tattao a posible a mangitunda iti panagwaras ti coronavirus.
Kabayatanna, maminsan manen a ginuyugoy ni Mayor Wales dagiti umili ti Bokod para iti panagparehistroda iti vacciantion rollout sadiay tapnu maprotektaran dagitoy manipud iti nasao a sakit.
Inyunay-unayna a saan a nasken nga mamati dagitoy kadagiti maipabpablaak iti social media gaputa awan ti kinapudno daytoy ken punasenda ti butengda seknan iti panagpabakuna gaputa dagiti eksperto nga indibidual ti nangaramid kadagiti bakuna a maipapay iti publiko.
