Impakaamo ti embahada ti Pilipinas idiay Thailand nga awan pay ti naawatda nga aniaman a report seknan iti pimmusay a Pilipino kasaruno ti ginggined a nangdayyeg ti Thailand ken Myanmar idi Biernes.
Iti maysa a statement, kinuna ti embahada ti Pilipinas a palso a damag ti mangibagbaga a sangapulo a Pilipino ti pimmusay iti ginggined idiay Thailand.
Kinuna ti Embahada nga agtultuloy ti panagmonitorda iti sitwasion para kadagiti Pilipino a mabalin a naapektaran ken agkasapulan ti dagos a tulong gapu iti ginggined.
Sigun kenni Department of Foreign Affairs Undersecretary Eduardo De Vega, dumanon iti innem a gasut sangapulo ket maysa a Pilipino ti nakarehistro idiay Myanmar ken agarup 29,000 met ti nakarehistro idiay Thailand.
Kabayatanna, immunan a kinuna ni Department of Foreign Affairs Undersecretary Eduardo De Vega a nakasagana ti Pilipinas a mangibaon kadagiti “team” a tumulong iti “rescue operations,” ngem ad-adda a mangipatulod ti pagilian iti tulong babaen iti kuarta ken taraon.
