BAGUIO CITY – Manamnama a mapilaan iti kaso a frustrated murder ti maysa a lalaki kalpasan a nakemmeg daytoy sadiay Sitio Al-aludig, Barangay Layugan, Bucay, Abra.
Nabigbig daytoy a ni Rodel Perillo, 43-anyos ken residente iti nasao a lugar bayat a ti biktima ket ni Victor Velasco, 47-anyos ken residente ti Barangay Madalipay, Bucay, Abra.
Iti inisyal nga imbestigasyon, binisita ti biktima ti anakna sadiay Sitio Al-aludig.
Nupay kasta, kabayatan ti panagnana iti asideg ti pagtaengan ti anakna ket killaat a pinang-uran ti suspek ti ulo ken sumagmamano a paset ti bagina babaen iti natangken a kayo iti namin-ado a daras.
Gapu iti daytoy, nagsagrap ti biktima iti nakaro a dunor iti ulona ken iti nagduduma a paset ti bagina.
Dagus met nga inreport ti 17-anyos nga ubing ti napasamak nga insidente iti Bucay Municipal Police Station.
Nangipatungpal met dagiti otoridad ti hot pursuit operation a nangitunda iti panakatiliw ti suspek.
Naiturong daytoy iti kustodiya ti Bucay MPS para iti panakaipila ti kaskenan a kaso kontra kenkuana.
