BAGUIO CITY – Maipaay kenni Apo Whang-od manipud Buscalan, Tinglayan, Kalinga ti 2018 Dangal Ng Haraya wenno Lifetime Achievement Award for Intangible Cultural Heritage babaen iti Commission for Culture and the Arts (NCCA).
Awaten ni Apo Whang-od wenno Maria Whang-od Oggay ti nasao a pammigbig iti conferment ceremony ita nga agsapa iti kapitolyo ti probinsia sadiay Tabuk City.
Maibasar iti special resolution a pinirmaan ni NCCA Chairman and National Artist for Literature Virgilio Almario, mabigbigbig ni Apo Whang Od kas maysa kadagiti oldest living traditional whatok wenno hand-tapped tattoo practitioners sadiay Kalinga.
Nailanad iti resolusyon a daydaywen dagiti adu a tattao ni Apo Whang-od tapnu laeng agpa-tattoo kadagiti nainsigudan a disenyo.
Nailanad pay a ni Apo Whang Od ket maysa a living vessel ti traditional practice a maiparbeng laeng a mabigbig gapu kadagiti kontribusyonna, partikular iti panakaipaay atension iti panagtattoo ken iti kultura ti Pilipinas.
Naamuan a rinugian ti 100-year old tattoo artist ti panag-tattoo iti tawenna a kinse ken nagbalin a signature daytoy ti panagaramat iti tinta manipud iti naglaok nga uging ken danum a maitattoo iti kudil babaen ti siit ti kalamansi wenno suha.
Mailadladawan pay ni Apo Whang-od kas kaudian ken kataengan a tattoo artist iti pagilian.
