Naideklara a fire-out pasado alas diez iti agsapa ita nga aldaw ti napasamak nga uram iti dua a pagtaengan idiay Sitio Jappa, Barangay Virac, Itogon, Benguet.
Iti panakiuman ti Bombo Radyo kenni Fire Officer III Billy Jack Palaci manipod Bureau of Fire Protection-Itogon, 8:08 itay agsapa a naitawag kadakuada ti maipapan iti uram.
Sigun kenni Palaci, dumanon iti mapatta-patta a nasurok Php4.3million ti danyos iti nasao nga structural fire nu sadino, buklen daytoy ti maysa a Php3.12 ken maysa a Php1.2 ti gatadna a pagtaengan.
Nadangran met ti maysa nga indibidwal iti nasao nga insidente ken manarimaanen iti panagpataming daytoy.
Iti agdama, agtultuloy paylaeng ti imbestigasyon tapno maduktalan ti nagtaudan wenno ti makaigapo iti panakapasamak ti nasao nga uram.//Bombo Rob Dominguez
